Walk Leader safety plan and report (Crickhowell Walking Festival)

Marchnata

Gweithgarwch synnwyr cyffredin yw marchnata. Mae’n golygu nodi’r math o bobl rydych chi am eu denu a datblygu’ch gŵyl a thargedu’ch gwaith hyrwyddo tuag atyn nhw.  Os nad ydych yn siŵr ble i ddechrau, cysylltwch â’ch awdurdod lleol (mae gan y mwyafrif swyddog cysylltiadau cyhoeddus) neu sefydliad rheoli cyrchfannau; efallai y gallan nhw roi cyngor ichi.

Mae gan y mwyafrif o wyliau wefan a rhaglen brintiedig a’r rhain yw prif gyfryngau fel arfer i roi gwybodaeth a chodi ymwybyddiaeth.  Er hynny, ar eu pen eu hunain, fydd y rhain ddim yn ddigon i hybu’ch gŵyl a bydd angen ichi drefnu cyhoeddusrwydd i helpu pobl i ddod o hyd i’r rhaglen a’r wefan.

Efallai y bydd gan eich sefydliad rheoli cyrchfannau neu’ch partneriaeth twristiaeth leol wybodaeth am y farchnad i gerddwyr a phobl eraill sy’n dod i’r ardal.  Mae gan rai, fel Bannau Brycheiniog, strategaethau twristiaeth gerdded y gallwch ffitio iddyn nhw ac maen nhw eisoes yn hybu’r ardal ar gyfer cerdded. Gofalwch gymryd rhan mewn unrhyw waith hyrwyddo o’r fath.

Yn gyffredinol, mae hysbysebu’n ddrud a gall fod yn anodd mesur y canlyniadau. Er hynny, efallai yr hoffech ystyried hysbysebion penodol yn y cylchgronau cerdded a rhywfaint o hysbysebion yn eich papurau newydd lleol.

Gofalwch ddod o hyd i bob rhestr o ddigwyddiadau mewn print ac ar-lein a sicrhau bod yr ŵyl (a’r teithiau cerdded unigol, os oes modd) wedi’u cynnwys yn y rhain.  Gweithgareddau eraill y gallech eu hystyried yw:

• Dosbarthu posteri neu daflenni lle mae pobl leol yn ymgasglu (llyfrgelloedd, meddygfeydd, caffis, tafarndai, etc.) a lle mae ymwelwyr yn dod (lletyau, atyniadau, etc.)
• Anfon hysbysiadau’r wasg at eich cyfryngau lleol a’r cyfryngau cerdded (neu gyfryngau arbenigol eraill os oes gan eich gŵyl thema benodol)
• Baner neu boster mawr sy’n weladwy i’r traffig sy’n pasio drwodd neu sy’n pasio heibio
• Rhoi gwybod i ddarparwyr llety am yr ŵyl er mwyn iddyn nhw ddweud wrth eu cwsmeriaid
• Mae’r cyfryngau cymdeithasol (Facebook, Twitter, Pinterest, YouTube, instagram, etc.) ar gael yn rhad ac am ddim, ond maen nhw’n cymryd amser; hefyd, maen nhw’n apelio at gynulleidfa iau
• Gofalwch fod eich ffrydiau cyfryngau cymdeithasol i’w gweld ar eich gwefan
• Rhowch gynnig ar Google ads – gallwch bennu’r geiriau allweddol yr hoffech ymateb iddyn nhw a gosod cap ar eich gwariant fesul diwrnod neu wythnos

Gwnewch yn siŵr eich bod yn casglu gwybodaeth oddi wrth bobl sy’n ymholi ac sy’n dod i’ch digwyddiad a’u defnyddio nhw fel rhestr bostio/e-bostio ar gyfer gwyliau’r dyfodol.

Heblaw am anelu at ddenu ymwelwyr i’r dref, wnaeth Gŵyl Gerdded Crucywel ddim pennu marchnad i’w thargedu.  Er hynny, mae’r trefnwyr yn defnyddio adborth am y rhaglen o deithiau cerdded i’w datblygu bob blwyddyn i ateb anghenion y cerddwyr: rhyw fath o ddull marchnata hunan-ddewisol.

Island of Barrow Walking Festival Advert

Island of Barrow Walking Festival Leaflets

Island of Barrow Press Release

Archebion

Bydd y mwyafrif, yn enwedig y rhai sy’n byw yn bell i ffwrdd, yn fodlon archebu (a thalu) ar-lein ac os oes modd fe ddylai’ch gwefan chi gynnwys yr opsiwn hwn.  Er hynny, bydd rhai pobl am archebu dros y ffôn neu mewn ysgrifen, felly dylech ganiatáu ar gyfer hynny hefyd, os oes modd.  Os nad oes gennych fedrau mewn technoleg gwybodaeth neu gyllideb fawr, un opsiwn rhad yw archebu drwy’r ebost a thalu ar ôl cyrraedd yr ŵyl neu ar ddechrau pob taith.

Mae gwahanol ffyrdd o drin archebion ac mae gan bob un ei manteision a’i hanfanteision.  Er enghraifft, gallech reoli’r archebion i gyd eich hun.  Bydd hynny’n rhoi rheolaeth ichi ac yn cynyddu’ch incwm i’r eithaf, ond bydd angen ichi sefydlu system gyllid electronig a dod o hyd i bobl i’w rheoli yn ogystal â thrafod unrhyw archebion dros y ffôn, yr ebost neu’r post.

Efallai yr hoffech roi’r gwaith trafod archebion i drydydd parti. Mae Gŵyl Gerdded Gogledd y Pennines wedi rhoi cynnig ar dri dull: rheoli’r archebion eu hunain, trefnu bod awdurdod lleol yn trafod yr archebion a phenodi contractiwr preifat.  Ar ôl cloriannu’r tri dull, y dewis ar hyn o bryd yw defnyddio contractiwr preifat.

Cyllid

Bydd yn costio arian yn ogystal ag amser gwirfoddolwyr i redeg gŵyl gerdded.  Prin iawn yw’r gwyliau sy’n talu eu costau gweithredu ar sail ffioedd am deithiau ac am gymryd rhan yn unig, er bod rhai yn anelu at y nod hwnnw.  Mae’r mwyafrif o wyliau’n dibynnu ar un neu ragor o fathau o arian allanol er mwyn talu eu costau.  Gallai’r rhain ddod o’r canlynol:

• Cymorth gan eich awdurdod lleol neu ‘bartneriaid’ eraill
• Grantiau (er enghraifft grantiau cymunedol sydd ar gael gan y sector cyhoeddus neu gan fusnesau neu ymddiriedolaethau sy’n rhoi grantiau)
• Hysbysebion yn eich rhaglen ac ar eich gwefan
• Nawdd gan fusnesau lleol

Bydd angen ichi bwyso a mesur unrhyw amodau sy’n dod ynghyd â grantiau neu fathau eraill o gymorth.  Dylech feddwl yn ofalus am nawdd.  Gallai cyflenwyr offer cenedlaethol gynnig bargen noddi hael, ond dylech ystyried sut y bydd y cyflenwyr lleol yn gweld hynny.  Er enghraifft, penderfynodd Gŵyl Gerdded Crucywel dderbyn nawdd ar lefel is gan siop awyr agored leol yn hytrach na swm mwy gan fanwerthwr cenedlaethol adnabyddus a hynny er mwyn cefnogi busnes lleol.

Bydd paratoi cynllun busnes ac amcan o’r llif arian yn eich helpu i ddeall eich anghenion ariannol ac i osgoi rhedeg allan o arian cyn i’r ŵyl ddigwydd.

Digwyddiadau/gweithgareddau heblaw cerdded

Mae rhai gwyliau hefyd yn cynnig rhaglen o ddigwyddiadau gyda’r os neu ddigwyddiadau heblaw cerdded.  Gall y rhain gymryd amser ac ymdrech i’w trefnu ac nid pob un fydd yn llwyddo.  Efallai yr hoffech wahodd mudiadau eraill i drefnu digwyddiadau a’u hybu nhw wedyn fel rhan o’r ŵyl.  Bydd hynny’n lleihau’ch llwyth gwaith a’ch risg ac mae’n ffordd dda i helpu mudiadau eraill yn eich cymuned.

Rhestrau gwirio

Enghreifftiau o astudiaethau achos

Mae Gŵyl Gerdded Berwick yn cael ei rheoli gan grŵp llywio lleol, ond mae’n cael ei threfnu gan weithredwr cerdded lleol.  Mae Shepherds Walks yn cydweithio â’r grŵp llywio i gynllunio’r ŵyl, gan recriwtio arweinwyr teithiau cerdded wedyn a hybu’r ŵyl.  Mae’r archebion yn cael eu trafod drwy system archebu awtomataidd y cwmni.  Mae gan y cyfuniad hwn rhwng y sector preifat a’r sector cyhoeddus nifer o fanteision gan fod y grŵp, gyda’i gilydd, yn gallu galw ar arian y sector cyhoeddus ac arweinwyr gwirfoddol sy’n cael eu defnyddio’n effeithiol wedyn gan y gweithredwr masnachol, er enghraifft wrth ddatblygu gwefan ddeniadol a hybu’r ŵyl i’r 18,000 o gerddwyr yn eu cronfa ddata. Gweler berwickwalking.co.uk

Mae Gŵyl Gerdded Gogledd y Pennines yn cynnwys canllawiau ar sut y dylai arweinwyr ac eraill ymwneud â phobl sydd ag amryw o anableddau (gweler xxx).  Gallech gydategu hyn â hyfforddiant. Gofynnwch i’ch grŵp mynediad anabledd lleol a allan nhw helpu.

Gofynnodd Gŵyl Gerdded Glenkens i’r grŵp achub mynydd lleol redeg rhaglen hyfforddi i arweinwyr teithiau cerdded.  Sicrhaodd hyn hyfforddiant o safon am bris oedd yn cynnig gwerth am arian a chreu cyllid i’r grŵp Achub Mynydd.

Mae gan Ŵyl Gerdded Ynys Wyth system raddio gynhwysfawr â symbolau hawdd eu deall i esbonio cyflymder, faint o straen yw pob taith, y cyfleusterau ar hyd y daith a gwybodaeth arbennig i bobl sy’n ei chael yn anodd symud o gwmpas (gweler tudalen symbolau Gŵyl Ynys Wyth).

Mae gan Ŵyl Gerdded Talgarth system syml o bedair gradd sy’n cyfuno pellter a faint o straen yw pob taith (gweler graddau Talgarth).

Sicrhaodd Gŵyl Gerdded Winchcombe gyhoeddusrwydd cenedlaethol drwy wahodd newyddiadurwyr cerdded ac ysgrifenwyr teithio i ymweld â Winchcombe a’r ŵyl.  Mae darparwyr llety fel arfer yn fodlon rhoi ystafell am ddim i newyddiadurwyr ar ymweliad a bydd pobl eraill yn helpu gyda chostau ychwanegol.

Ceisiwch ddod o hyd i themâu ehangach y gallwch ymuno â nhw. Yn 2015, trefnodd Gŵyl Gerdded Gogledd y Pennines thema i gyd-fynd â 50fed pen-blwydd Ffordd y Pennines.

Byddwch yn realistig ynglŷn â’ch costau a pheidiwch bod ofn codi tâl.  Mae pobl yn fodlon talu pris teg am gynnyrch o safon here