Mae Parc Cenedlaethol Bannau Brycheiniog yn gwahodd trigolion, busnesau ac ymwelwyr i gymryd rhan mewn Diffodd Awyr Dywyll arbennig ddydd Sul yma, 23ain Chwefror 2025, rhwng 7pm ac 8pm. Mae’r fenter hon yn rhan o Wythnos Awyr Dywyll Cymru, dathliad o harddwch a phwysigrwydd awyr y nos yma yng Nghymru.
Mae Wythnos Awyr Dywyll Cymru yn dod â Pharciau Cenedlaethol ac Ardaloedd o Harddwch Naturiol Eithriadol at ei gilydd mewn ymdrech ar y cyd i godi ymwybyddiaeth o lygredd golau. Mae golau artiffisial nid yn unig yn lleihau faint o’r sêr rydym yn ei weld ond mae hefyd yn amharu ar fywyd gwyllt ac yn effeithio ar iechyd pobl. Drwy ddiffodd goleuadau nad ydynt yn hanfodol am awr, bydd cyfranogwyr yn helpu i dynnu sylw at bwysigrwydd amddiffyn ein nosweithiau naturiol.
Meddai Carol Williams, Swyddog Twristiaeth Gynaliadwy Bannau Brycheiniog:
“Fel Gwarchodfa Awyr Dywyll Ryngwladol, mae Parc Cenedlaethol Bannau Brycheiniog yn enwog am ei gyfleoedd syllu sêr eithriadol. Gellir dod o hyd i rai o’r awyr dywyll o’r ansawdd uchaf yn y DU yma. Mae’r Diffodd Awyr Dywyll yn ffordd syml ond pwerus o ailgysylltu â rhyfeddodau’r awyr nos. Drwy annog ein cymuned yn y Parc Cenedlaethol i ddiffodd eu goleuadau neu gau eu llenni am awr, ein nod yw codi ymwybyddiaeth o effaith llygredd golau.”
Bydd Theatr Brycheiniog a Chanolfan Ymwelwyr y Parc Cenedlaethol i gyd yn ymuno â’r digwyddiad ac yn diffodd eu goleuadau.
Meddai Anna Wormleighton, Rheolwr Marchnata, Cyfathrebu a Chynulleidfaoedd, Theatr Brycheiniog:
“Mae Theatr Brycheiniog yn falch o sefyll o fewn Bannau Brycheiniog ac o dan y Warchodfa Awyr Dywyll Ryngwladol ysblennydd. Ar ddydd Sul 23 Chwefror byddwn yn ymuno â’r ‘diffodd’ ac yn gobeithio am noson glir fel y gall pawb yn y warchodfa syllu i fyny ar awyr hudolus y nos a gweld rhywbeth hudolus.”
Mae Parc Cenedlaethol Bannau Brycheiniog yn annog pawb i gymryd rhan trwy ddiffodd goleuadau ddydd Sul, mynd allan, a chymryd ennyd i werthfawrogi awyr hudolus ein nos.
DIWEDD