Mae Awdurdod Parc Cenedlaethol Bannau Brycheiniog yn falch iawn o nodi ugain mlynedd ers dynodi Fforest Fawr yn Geoparc. I ddathlu’r garreg filltir hon, cynhelir gŵyl arbennig dros ddau benwythnos: 27–28 Medi 2025 yn y Ganolfan Ymwelwyr, Aberhonddu, a 11–12 Hydref 2025 ym Mharc Gwledig Craig-y-Nos.
Wedi’i sefydlu yn 2005 a’i chydnabod gan UNESCO yn 2015, mae’r Fforest Fawr yn cwmpasu 763 km² o ucheldiroedd dramatig, coetiroedd, afonydd a thirweddau hanesyddol. Mae wedi dod yn ystafell ddosbarth fyw ac yn ganolbwynt treftadaeth, daeareg, bioamrywiaeth a thwristiaeth gynaliadwy, ac mae wedi cyflawni “cerdyn gwyrdd” UNESCO ar gyfer rhagoriaeth yn gyson.
Rhaglen yr Ŵyl.
Bydd y ddau benwythnos yn dod â’r Geoparc yn fyw trwy deithiau cerdded a sgyrsiau:
- Sgyrsiau a Darlithoedd: Darganfyddwch Esblygiad Planhigion Blodeuol gyda botanegwyr arbenigol, a chlywed hanes Prosiect Tramffyrdd Bannau Brycheiniog yn olrhain ein treftadaeth ddiwydiannol.
- Teithiau Cerdded wedi eu Tywys: Archwiliwch lwybrau thematig gan gynnwys Haearn a Rhew (daeareg a rhewlifoedd), Karst, Ogofâu, Creigiau ac Odynau (tirweddau calchfaen), a Chyfoeth Dŵr (afonydd, cronfeydd dŵr a rhaeadrau).
- Dysgu ymarferol: Cwrdd ag arbenigwyr lleol a grwpiau cymunedol sy’n arddangos treftadaeth ddiwylliannol a naturiol y Geoparc.
Mae pob digwyddiad wedi’i gynllunio i ddyfnhau dealltwriaeth o’r tir o dan ein traed a’r straeon y mae’n eu hadrodd, wrth annog pobl i archwilio a mwynhau’r Geoparc yn gyfrifol.
Dywedodd Alan Bowring, Swyddog Geoparc, Awdurdod Parc Cenedlaethol Bannau Brycheiniog:
“Rydym yn hynod falch o nodi dau ddegawd ers i’r Fforest Fawr gael ei ddynodi am y tro cyntaf. Yn ystod y cyfnod hwn rydym wedi gweithio’n agos gyda chymunedau, partneriaid ac ymwelwyr i ddiogelu ein daeareg, treftadaeth a bioamrywiaeth gyfoethog. Mae’r dathliadau hyn nid yn unig yn ymwneud ag edrych yn ôl, ond am rannu stori’r dirwedd hon, ac adnewyddu ein hymrwymiad i’w dyfodol.”
Archebwch eich tocynnau i’r ŵyl yma – Geoparc 20